(តាកែវ)៖ តំណាងអយ្យការអមសាលាដំបូងខេត្តតាកែវ បានចេញដីកាកោះហៅលោក ឡោ ជំនិត អភិបាលរងស្រុកបាទី ឱ្យចូលខ្លួនមកកាន់សាលាដំបូងខេត្ត ដើម្បីសាកសួរ និងបំភ្លឺពាក់ព័ន្ធនឹងបណ្តឹងព្រហ្មទណ្ឌ ពីបទ «រំលោភលើទំនុកចិត្ត» ដែលត្រូវបានប្តឹង និងកើតមាននៅក្នុងក្រុងដូនកែវ ខេត្តតាកែវ។
យោងតាមដីកាកោះផ្លូវការរបស់សាលាដំបូងខេត្តតាកែវ ដែលទទួលបាននៅថ្ងៃទី១៦ ខែកក្កដា ឆ្នាំ២០២៦ បានបញ្ជាក់ថា ជនសង្ស័យឈ្មោះ ឡោ ជំនិត ភេទប្រុស កើតថ្ងៃទី១៨ ខែសីហា ឆ្នាំ១៩៧៨ ជនជាតិខ្មែរ មានអាសយដ្ឋានបច្ចុប្បន្នស្ថិតនៅភូមិស្មៅខ្ចី ឃុំត្រពាំងសាប ស្រុកបាទី ខេត្តតាកែវ ត្រូវបានកោះហៅឱ្យចូលខ្លួនតាមនីតិវិធី។
ក្នុងដីកាដដែលបានបញ្ជាក់ថា លោក ឡោ ជំនិត ត្រូវចូលខ្លួនមកកាន់អយ្យការអមសាលាដំបូងខេត្តតាកែវ នៅថ្ងៃទី២២ ខែកក្កដា ឆ្នាំ២០២៦ វេលាម៉ោង ៩:៣០ នាទីព្រឹក ដើម្បីឆ្លើយបំភ្លឺអំពីអង្គហេតុពាក់ព័ន្ធបទ «រំលោភលើទំនុកចិត្ត» ដែលបានកើតឡើងនៅចំណុចភូមិស្នោរ សង្កាត់រកាក្រៅ ក្រុងដូនកែវ ខេត្តតាកែវ កាលពីថ្ងៃទី១១ ខែវិច្ឆិកា ឆ្នាំ២០២០ តាមបណ្តឹងរបស់ឈ្មោះ ដួង ស្រីលក្ខណ៍។
ប្រភពឯកសារផ្លូវការបានឱ្យដឹងថា ការកោះហៅនេះ គឺជានីតិវិធីរបស់ស្ថាប័នមានសមត្ថកិច្ច ដើម្បីសាកសួរ និងស្វែងរកការពិតជុំវិញសំណុំរឿងពាក់ព័ន្ធ ខណៈជនពាក់ព័ន្ធមានសិទ្ធិបកស្រាយ និងការពារខ្លួនតាមច្បាប់ជាធរមាន។
បច្ចុប្បន្ន ដីកាកោះហៅផ្លូវការនេះ ត្រូវបានប្រគល់ជូនសាមីខ្លួនរួចរាល់ ដើម្បីធានាថាជនពាក់ព័ន្ធបានទទួលជ្រាប និងត្រូវចូលខ្លួនដោះស្រាយតាមនីតិវិធីច្បាប់។
សូមបញ្ជាក់ថា ការកោះហៅសាកសួរមិនទាន់មានន័យថា បុគ្គលណាម្នាក់មានពិរុទ្ធភាពនោះទេ លុះត្រាតែមានការសម្រេចជាផ្លូវការពីតុលាការតាមនីតិវិធី៕
No comments:
Post a Comment