(កណ្ដាល)៖ ប្រជាពលរដ្ឋមួយចំនួនតូច កំពុងចាប់ផ្ដើមសាងសង់លំនៅឋាននៅក្នុងដីឡូតិ៍របស់លោក ថោង សារ៉ាត់ ស្ថិតនៅភូមិលេខ១ «ក» សង្កាត់ស្វាយរលំ ក្រុងតាខ្មៅ ខេត្តកណ្ដាល យ៉ាងអាណាធិបតេយ្យក្រោយមានការផ្សព្វផ្សាយថា «ទិញភ្លាម សាងសង់បានភ្លាម» ខណៈអ្នកទិញខ្លះមិនប្លង់នៅក្នុងដៃនៅឡើយ តើស្ថាបនណាអនុញ្ញាតឲ្យមានការសាងសង់?។
ទោះជាយ៉ាងណា ការផ្សព្វផ្សាយបែបនេះ អាចធ្វើឱ្យប្រជាពលរដ្ឋមួយចំនួនមានការភាន់ច្រឡំថា អាចសាងសង់បានភ្លាម ដោយមិនចាំបាច់អនុវត្តនីតិវិធីច្បាប់។ ជាក់ស្តែង ការសាងសង់អគារ ឬលំនៅឋាន មិនថានៅលើដីកម្មសិទ្ធិរបស់ខ្លួន ឬដីឡូតិ៍ដែលបានទិញស្របច្បាប់នោះទេ ក៏នៅតែត្រូវអនុវត្តតាមច្បាប់សំណង់ជាធរមាន ដោយត្រូវមានលិខិតអនុញ្ញាតសាងសង់ និងលិខិតអនុញ្ញាតបើកការដ្ឋាន (នៅករណីដែលច្បាប់តម្រូវ) ពីអាជ្ញាធរមានសមត្ថកិច្ច មុននឹងចាប់ផ្ដើមសាងសង់។
ច្បាប់សំណង់ត្រូវបានបង្កើតឡើង មិនមែនដើម្បីរារាំងការសាងសង់នោះទេ ប៉ុន្តែដើម្បីធានាថា សំណង់នីមួយៗមានសុវត្ថិភាព បំពេញស្តង់ដារបច្ចេកទេស មិនប៉ះពាល់ដល់ប្រព័ន្ធលូ ផ្លូវសាធារណៈ សុវត្ថិភាពអ្នកជិតខាង បរិស្ថាន និងការអភិវឌ្ឍទីក្រុងប្រកបដោយនិរន្តរភាព។
ការសាងសង់ដោយមិនបានអនុវត្តតាមនីតិវិធីច្បាប់ អាចនាំឱ្យប្រឈមនឹងវិធានការរដ្ឋបាល ដូចជាការផ្អាកការដ្ឋាន ការតម្រូវឱ្យកែសម្រួល ឬការអនុវត្តវិធានការផ្សេងៗតាមច្បាប់ ប្រសិនបើអាជ្ញាធរពិនិត្យឃើញថាមិនបានគោរពតាមបទប្បញ្ញត្តិជាធរមាន។
លើសពីនេះ ការមិនមានការត្រួតពិនិត្យផ្នែកបច្ចេកទេស អាចបង្កហានិភ័យដូចជា គ្រឹះមិនរឹងមាំ សសរមិនគ្រប់ស្តង់ដារ ការទុកចន្លោះដីមិនត្រឹមត្រូវ ប្រព័ន្ធបង្ហូរទឹកខ្វះប្រសិទ្ធភាព ហានិភ័យអគ្គិភ័យ ឬបញ្ហាផ្សេងៗដែលអាចប៉ះពាល់ដល់សុវត្ថិភាពអ្នករស់នៅ និងសហគមន៍ជុំវិញ។
យោងតាមប្រភពពីប្រជាពលរដ្ឋ នៅថ្ងៃទី១៩ ខែកក្ដដា ឆ្នាំ២០២៦ ពួកគាត់បានលើកឡើងថា ការផ្សព្វផ្សាយពាក្យថា «ទិញភ្លាម សាងសង់បានភ្លាម» អាចបង្កឱ្យមានការយល់ច្រឡំធ្ងន់ធ្ងរ ប្រសិនបើមិនមានការបញ្ជាក់ឱ្យច្បាស់ថា ការសាងសង់នៅតែត្រូវអនុវត្តតាមច្បាប់ និងទទួលបានការអនុញ្ញាតពីអាជ្ញាធរមានសមត្ថកិច្ចជាមុន។
មហាជនសូមអំពាវនាវដល់លោក ថោង សារ៉ាត់ និងអាជ្ញាធរសង្កាត់ស្វាយរលំ ជាពិសេសលោក ឃឹម សំភារ ចៅហ្វាយក្រុងតាខ្មៅ មេត្តាចេញការបំភ្លឺជាសាធារណៈថា តើការផ្សព្វផ្សាយខាងលើមានន័យដូចម្តេច និងតើអ្នកទិញដីឡូតិ៍ត្រូវបំពេញនីតិវិធីអ្វីខ្លះ មុនពេលចាប់ផ្ដើមសាងសង់ ដើម្បីបញ្ចៀសការភាន់ច្រឡំ និងធានាថាប្រជាពលរដ្ឋទាំងអស់អនុវត្តតាមច្បាប់បានត្រឹមត្រូវ។
ការអភិវឌ្ឍល្អ មិនមែនគ្រាន់តែសង់បានលឿននោះទេ ប៉ុន្តែត្រូវសង់ដោយស្របច្បាប់ ស្របបទដ្ឋានបច្ចេកទេស និងមានទំនួលខុសត្រូវចំពោះសុវត្ថិភាពសាធារណៈ៕
No comments:
Post a Comment