ប្រជាពលរដ្ឋរអ៊ូរទាំករណីរោងចក្រកែច្នៃ និងកិនកុងផ្លាកេបញ្ចេញធូលីហុយប៉ះពាល់ការរស់នៅ ស្នើរដ្ឋមន្ត្រីបរិស្ថានចុះពិនិត្យជាបន្ទាន់

(កណ្ដាល)៖ ប្រជាពលរដ្ឋរស់នៅក្នុងភូមិម្កាក់ ឃុំដើមឬស្ស ស្រុកកណ្ដាលស្ទឹង ខេត្តកណ្ដាល បានបន្តរាយការណ៍មក Phally News ថា សកម្មភាពរបស់រោងចក្រកែច្នៃ និងកិនកុងផ្លាកេមួយកន្លែងថា បង្កការហុយធូលី និងផ្សែងចូលតំបន់លំនៅឋាន បង្កការរំខានដល់ការរស់នៅ និងផ្លូវដង្ហើមរបស់ប្រជាពលរដ្ឋស្ទើរជារៀងរាល់ថ្ងៃ។

តាមការអះអាងរបស់ពលរដ្ឋ នៅថ្ងៃទី៣០ ខែសីហា ឆ្នាំ២០២៦នេះ ខណៈរោងចក្រដំណើរការកិន និងកែច្នៃកុងផ្លាកេ ធូលីត្រឡូមត្រូវបានគេមើលឃើញថា ហុយចេញពីបរិវេណរោងចក្រ និងរាលដាលទៅកាន់តំបន់ជុំវិញ។ ប្រជាពលរដ្ឋមួយចំនួនបារម្ភថា ប្រសិនបើស្ថានភាពនេះបន្តយូរ អាចបង្កផលប៉ះពាល់ដល់គុណភាពខ្យល់ និងសុខុមាលភាពអ្នករស់នៅក្បែរនោះ។

តាមគោលការណ៍ការពារបរិស្ថាន និងការគ្រប់គ្រងការបំពុល រោងចក្រដែលមានសកម្មភាពបង្កើតធូលី ឬការបំភាយទៅក្នុងបរិយាកាស គួរតែមាន ប្រព័ន្ធគ្រប់គ្រងធូលី និងការបំភាយឱ្យបានត្រឹមត្រូវ ដូចជា ប្រព័ន្ធបូមស្រូបធូលី ឧបករណ៍ចម្រោះ ស្ទាក់ធូលី ការបិទជិតចំណុចកិន ការគ្រប់គ្រងវត្ថុធាតុដើម និងការត្រួតពិនិត្យគុណភាពខ្យល់ជាប្រចាំ។

ជាពិសេស សកម្មភាពកិនសម្ភារៈដែលបង្កើតភាគល្អិតល្អិតៗ ប្រសិនបើគ្មានវិធានការទប់ស្កាត់គ្រប់គ្រាន់ អាចបង្កឱ្យមានបញ្ហាផ្នែកផ្លូវដង្ហើម និងធ្វើឱ្យបរិយាកាសរស់នៅមានភាពមិនអំណោយផល។ ដូច្នេះ ការត្រួតពិនិត្យតាមបច្ចេកទេស គួរត្រូវបានអនុវត្តដោយមានការវាស់វែងជាក់ស្តែង មិនគួរពឹងផ្អែកតែលើការសន្និដ្ឋាន ឬការអះអាងរបស់ភាគីណាមួយឡើយ។

ប្រជាពលរដ្ឋបានលើកឡើងថា បញ្ហានេះត្រូវបានរាយការណ៍ជាបន្តបន្ទាប់ និងត្រូវគេលើកជាចម្ងល់ថា មិនមែនទើបកើតឡើងថ្មីៗនោះទេ តើមន្ទីរបរិស្ថានខេត្តកណ្ដាលបានចុះត្រួតពិនិត្យទីតាំងនេះប៉ុន្មានលើក? តើមានការវាស់វែងគុណភាពខ្យល់ និងធូលីភាគល្អិតតាមស្តង់ដារបច្ចេកទេសដែរឬទេ? ហើយប្រសិនបើរកឃើញថាមានការបំពុលលើសកម្រិត តើមានវិធានការកែតម្រូវ ឬផ្អាកសកម្មភាពតាមច្បាប់ហើយឬនៅ?

ជុំវិញករណីនេះ មហាជនបានលើកឡើងពីកង្វល់ និងស្នើឱ្យស្ថាប័នមានសមត្ថកិច្ចចុះពិនិត្យជាក់ស្តែង ដើម្បីរកការពិត និងធានាថាការអភិវឌ្ឍឧស្សាហកម្មមិនត្រូវប្តូរជាមួយសុខភាព និងគុណភាពជីវិតរបស់ប្រជាពលរដ្ឋ។

ជាមួយគ្នានេះ ប្រជាពលរដ្ឋស្នើសុំ លោក អ៊ាង សុផល្លែត រដ្ឋមន្ត្រីក្រសួងបរិស្ថាន មេត្តាពិនិត្យ និងចាត់ក្រុមការងារជំនាញចុះអង្កេតករណីនេះជាបន្ទាន់ ដោយពិនិត្យទាំងលក្ខខណ្ឌបរិស្ថាន ប្រព័ន្ធទប់ស្កាត់ធូលី និងផ្សែង ការបំភាយទៅក្នុងបរិយាកាស ព្រមទាំងវាស់វែងគុណភាពខ្យល់នៅក្នុង និងជុំវិញរោងចក្រ។

ប្រសិនបើរកឃើញថា មានការបំពានលើបទដ្ឋានបរិស្ថាន ឬបង្កការបំពុលលើសកម្រិត សូមចាត់វិធានការតាមច្បាប់ និងតម្រូវឱ្យម្ចាស់អាជីវកម្មកែលម្អប្រព័ន្ធបច្ចេកទេសឱ្យបានត្រឹមត្រូវ។ ផ្ទុយទៅវិញ ប្រសិនបើការត្រួតពិនិត្យបង្ហាញថា សកម្មភាពរោងចក្រស្ថិតក្នុងស្តង់ដារ ក៏គួរបង្ហាញលទ្ធផលជាសាធារណៈ ដើម្បីបញ្ចប់ការសង្ស័យ និងការព្រួយបារម្ភរបស់ប្រជាពលរដ្ឋ។

សុខភាពប្រជាពលរដ្ឋ និងបរិស្ថានស្អាត គួរត្រូវបានដាក់ជាអាទិភាព មុនផលប្រយោជន៍ណាមួយ។ ប្រសិនបើបញ្ហាត្រូវបានរាយការណ៍ជាយូរមកហើយ ការចុះពិនិត្យជាក់ស្តែង និងការបង្ហាញលទ្ធផលដោយតម្លាភាព គឺជាចម្លើយដែលប្រជាពលរដ្ឋកំពុងរង់ចាំ៕