សំណង់ត្រូវគោរពច្បាប់ មិនមែនអនុវត្តតាមអំពើអាណាធិបតេយ្យទេ! ឃ្លាំងសង្ស័យបានកំពុងសង់អត់ច្បាប់ នៅអង្គស្នួល!

កណ្ថាល)៖ សំណង់គ្រប់ប្រភេទ មិនថាជាផ្ទះសម្បែង រោងចក្រ ឬឃ្លាំងនោះទេ ត្រូវតែអនុវត្តស្របតាមច្បាប់សំណង់ និងបទដ្ឋានបច្ចេកទេសជាធរមាន ដើម្បីធានាសុវត្ថិភាពសាធារណៈ ការរៀបចំដែនដី បរិស្ថាន និងសណ្តាប់ធ្នាប់សង្គម។ ការសាងសង់ដោយគ្មានការអនុញ្ញាត ឬមិនគោរពលក្ខណៈបច្ចេកទេស ប្រសិនបើពិតជាកើតមានមែន នោះអាចបង្កហានិភ័យធ្ងន់ធ្ងរដល់ប្រជាពលរដ្ឋ និងប៉ះពាល់ដល់ការអនុវត្តនីតិរដ្ឋ។

ជាក់ស្តែង មានការលើកឡើងពីប្រជាពលរដ្ឋថា មានសំណង់ឃ្លាំងមួយកំពុងសាងសង់នៅភូមិព្រៃខ្លា ឃុំក្រាំងម្កាក់ ស្រុកអង្គស្នួល ខេត្តកណ្ដាល ដែលគេសង្ស័យថាមិនទាន់មានច្បាប់អនុញ្ញាតត្រឹមត្រូវ។ ប្រសិនបើព័ត៌មាននេះពិត មហាជនក៏ចោទជាសំណួរថា តើអាជ្ញាធរមូលដ្ឋានបានអនុវត្តតួនាទីត្រួតពិនិត្យ និងទប់ស្កាត់សំណង់ខុសច្បាប់បានពេញលេញហើយឬនៅ?

ក្នុងនាមជាចៅហ្វាយស្រុកអង្គស្នួល លោក នូ សុវណ្ណារិទ្ធ គួរតែពន្យល់ជាសាធារណៈអំពីករណីនេះ ដើម្បីឱ្យប្រជាពលរដ្ឋទទួលបានព័ត៌មានច្បាស់លាស់ និងបំបាត់ការសង្ស័យ។ គួរបញ្ជាក់ថា គិតត្រឹមម៉ោងផ្សាយ អង្គភាព Philly News មិនទាន់អាចសុំការបំភ្លឺពីលោកបាននៅឡើយ ដោយការហៅទូរស័ព្ទមិនមានអ្នកទទួល និងការផ្ញើសារតាម Telegram ក៏មិនទាន់មានការឆ្លើយតប។

អ្វីដែលសាធារណជនចង់ឃើញ គឺការអនុវត្តច្បាប់ដោយស្មើភាព និងតម្លាភាព មិនថាសំណង់នោះជារបស់អ្នកណា ឬមានអ្នកមានឥទ្ធិពលប៉ុណ្ណាក៏ដោយ។ មន្ត្រីគ្រប់រូបមានកាតព្វកិច្ចបម្រើប្រជាពលរដ្ឋ និងឆ្លើយតបចំពោះសំណួរសាធារណៈ ដោយមិនគួរឱ្យមានការយល់ច្រឡំថា មានការការពារផលប្រយោជន៍ឯកជន ឬការអនុវត្តច្បាប់ពីរបែបនោះឡើយ។

អាស្រ័យហេតុនេះ សូមគោរពស្នើសុំដល់ លោក គួច ចំរើន អភិបាលខេត្តកណ្ដាលមេត្តាចាត់ឱ្យមន្ត្រីជំនាញពាក់ព័ន្ធចុះស្រាវជ្រាវ និងត្រួតពិនិត្យជាបន្ទាន់លើសំណង់ខាងលើ។ ប្រសិនបើរកឃើញថាមានការរំលោភច្បាប់សំណង់ ឬមិនគោរពលក្ខណៈបច្ចេកទេស សូមអនុវត្តវិធានការតាមច្បាប់ដោយម៉ឺងម៉ាត់ និងស្មើភាព ដើម្បីរក្សាកិត្តិយសរដ្ឋបាលខេត្ត និងពង្រឹងជំនឿរបស់ប្រជាពលរដ្ឋលើការអនុវត្តច្បាប់។

មហាជនស្នើសុំឱ្យស្ថាប័នពាក់ព័ន្ធបំពេញតួនាទីប្រកបដោយការទទួលខុសត្រូវ តម្លាភាព និងគោរពនីតិរដ្ឋ ដើម្បីផលប្រយោជន៍រួមរបស់សង្គម៕