ខេត្តកំពង់ចាម÷ប្រជាពលរដ្ឋ,សាធារណៈជនធ្វើដំណើរពីភ្នំពេញទៅកំពង់ចាមលើផ្លូវជាតិលេខ៦A ជិតដល់ទីរួម ស្រុកបាធាយខ្វះប្រហែល១គីឡូម៉ែត្រ នៅខាងស្ដាំដៃនិងឃើញក្រុមរថយន្តដឹកជញ្ជូនអាចម៍ដីកំពុងធ្វើសកម្មភាពដូចស្រមោចចេញពីការដ្ឋានមួយកន្លែង។ រដ្ឋបាលស្រុកបាធាយបានអះអាងថា ការដ្ឋានជីកយកអាចម៍ដីនោះ មានច្បាប់ទម្លាប់ត្រឹមត្រូវ ចេញពីថ្នាក់ខេត្តទៀតផង។
សកម្មភាពដឹកអាចម៍ដីដោយរថយន្តរាប់សិបគ្រឿងនៅចំណុចភូមិ-ឃុំ-ស្រុកបាធាយខេត្តកំពង់ចាម ធ្វើឲ្យប្រជាពលរដ្ឋអ្នកធ្វើដំណើរតាមផ្លូវជាតិលេខ៦A រិះគន់យ៉ាងខ្លាំង។ ប្រជាពលរដ្ឋរស់នៅតំបន់ខាងលើនេះប្រាប់ថា ការដ្ឋានរណ្ដៅដីនេះជាកម្មសិទ្ធិរបស់ហ៊ាថន និងចែ នី ដែលជាឈ្មួញដ៏ធំ និងមានមុខមាត់នៅក្នុងមូលដ្ឋានខាងលើ។ សកម្មភាពនៃការដឹកជញ្ជូននេះរងការរិះគន់ពីអ្នកធ្វើដំណើរក៏ព្រោះតែមិនបានគ្របឲ្យបានត្រឹមត្រូវ។
នៅក្នុងទិដ្ឋភាពដែលអ្នកកាសែតបានឃើញផ្ទាល់ អំពីការដ្ឋានរណ្តៅដីខាងលើនេះ បើទោះជាការជីកដើម្បីស្ដារប្រឡាយសម្រាប់ស្តុបទឹក សកម្មភាពជីកយកអាចម៍ដីនោះមានរណ្ដៅដីច្រើនដុំច្រើនកន្លែងក្រហេងក្រហូង ដូចរន្ធបាយខុម។ រថយន្តរាប់សិបគ្រឿងដឹកជញ្ជូនអាចម៍
ដីដូចកណ្ដៀរ,ជញ្ជូនដីដើម្បីធ្វើដំបូក។
នៅក្នុងចំណោមរថយន្តរាប់សិបគ្រឿងទាំងនោះ ភាគ ច្រើនលើសលប់ មិនបានគ្របឲ្យបានត្រឹមត្រូវនោះទេ។ រថយន្តដែលបើកបរប្រជែងគ្នានៅលើផ្លូវ ជួនកាលអាចបណ្ដាលឲ្យធ្លាក់អាចម៍ដីប៉ះពាល់ដល់សុវត្ថិភាពអ្នកធ្វើដំណើរតាមពីក្រោយនោះផងដែរ។មិនតែប៉ុណ្ណោះអាចម៍ ដីដែលធ្លាក់មកលើផ្លូវក៏ធ្វើឲ្យប៉ះពាល់ដល់គិតខិតខំប្រឹង ប្រែងរបស់អាជ្ញាធរស្រុកបាធាយ ក៏ដូចជារដ្ឋបាលខេត្តកំពង់ចាម នៅពេលដែលមានប្រតិភូជាតិឬអន្តរជាតិឆ្លង កាត់ផ្លូវជាតិលេខ៦Aត្រង់ចំណុចខាងលើនេះ។
លោកអួត ឈាងលី អភិបាលស្រុកបាធាយបានប្រាប់តាមប្រព័ន្ធទូរសព្ទនៅវេលាថ្ងៃទី១០ ខែកញ្ញាឆ្នាំ២០២៥ ថា ការដ្ឋានជីកយកដីខាងលើនេះ មានច្បាប់ទម្លាប់ត្រឹម ត្រូវ ហើយមានអាជ្ញាប័ណ្ណចេញដោយរដ្ឋបាលខេត្តកំពង់ចាមទៀតផង។ លោកអភិបាលស្រុកសង្កត់ធ្ងន់ថាប្រជាពលរដ្ឋនៅជុំវិញតំបន់នេះខ្វះខាតទឹកសម្រាប់ស្រោចស្រពស្រែ ក៏បានស្នើសុំឲ្យមានការជីកដើម្បីឲ្យមានប្រព័ន្ធមេទឹក។ ដូច្នេះប្រជាពលរដ្ឋក៏បានស្នើសុំទៅមន្ទីរជំនាញ ក្នុងការធ្វើប្រព័ន្ធមេទឹកសម្រាប់ស្រោចស្រពស្រូវ របស់ពួកគាត់។
លោកអភិបាលស្រុកបានបន្ថែមថា រដ្ឋបាលស្រុកតែងតែអប់រំណែនាំជាញឹកញាប់ អំពីបញ្ហានៃការដែលត្រូវដឹក ជញ្ជូនគ្របដើម្បីកុំឲ្យធ្លាក់អាចម៍ដីលើផ្លូវជាតិ។ លោកថា " ចាំមើលខ្ញុំឲ្យគេទៅមើលទៀត,ពីព្រោះយើងបានអប់រំណែនាំច្រើនដងហើយរឿងជ្រុះអាចម៍ដីនេះ"។ លោកបន្ថែមថា រដ្ឋបាលស្រុកកោះហៅក្រុមហ៊ុនដឹកជញ្ជូនមកណែនាំបន្ថែមទៀត រឿងគ្របពេលដឹកជញ្ជូន។
បើទោះជាយ៉ាងណាក៏ដោយ ប្រជាពលរដ្ឋអ្នកធ្វើដំណើរក៏ដូចជាសហគមន៍នៅជិតតំបន់នោះ មិនសប្បាយចិត្តនៅពេលដែលឃើញក្បួនរថយន្តដឹកជញ្ជូនអាចម៍ដីអើត ក្បាល (ឡាន)ចេញមក ពួកគាត់មានសេចក្តីព្រួយបារម្ភទៅហើយ។ ជួនកាលអ្នកបើកបររថយន្តដឹកដីទាំងនោះបើកប្រជែងគ្នានៅលើដងផ្លូវ ដែលងាយនឹងបង្កគ្រោះ ថ្នាក់ដល់អ្នកធ្វើដំណើរ។ នៅពេលដែលរថយន្តមិនបានគ្របឲ្យបានត្រឹមត្រូវនោះនឹងមានអាចម៍ដីជ្រុះធ្លាក់ មកហើយបង្កឲ្យរអិលដួលដល់អ្នកធ្វើដំណើរ។
ប្រជាពលរដ្ឋសំណូមពរឲ្យអាជ្ញាធរមានសមត្ថកិច្ចជួយពិនិត្យអំពីបញ្ហាសុវត្ថិភាពសម្រាប់អ្នក ធ្វើដំណើរនៅចំណុចខាងលើដែលមានរថយន្តដឹកដីជាច្រើនគ្រឿងចេញ,ចូលនោះផង។លោកឃុត ឃីម មេឃុំបា ធាយ បានបញ្ជាក់ប្រាប់ យ៉ាងខ្លីថា សូមទាក់ទិននឹងករណីខាងលើនេះ សូមទំនាក់ទំនងទៅរដ្ឋបាលសាលាស្រុកបាធាយ។
No comments:
Post a Comment